記得在我初學投資時，由於不斷睇書學習，過程中學到不少操作的理論及策略。但講真，能夠俾我這種平凡的老散，實際用到的是非常之少，當中我覺得對我最有幫助之一，就係傑西 李佛摩(Jesse Livermore)的金字塔理論。這位沽空之神距離現在已經有百年歷史，絕對稱得上古法。書中詳情請參閱「股票作手回憶錄」。
係阿李生學到的簡單來說，就是在一隻股票後，股價向上加注就會減，向下時注碼就會加，向上加碼不會大過第一注，形成一個由上而下的金字塔型狀，若是沽空操作則相反，另外要嚴守止蝕位(關於止蝕，下次有機會再講)。
而在我認識用法後，自己都對這方法做出唔少改變，來迎合自己的簡單簡單投資方式。我用我充滿藝術細胞方式畫咗呢張圖，希望可以充分表達岀來。
左邊係我常用的買入賣出方式，
先講買入，係二個金字塔交接位就係係我自己做完功課後，認為是合理估值再折讓下的買入點，再將本來預算作長期投資的資金分為十份，係該價會買入第一份的資金，如果股價再下跌，就到第二份，金額是之前的二倍，以此類推直到第四次，即是最大的第四份。而下跌幾多再加注就很難固定而言，因為始終內在價值每間公司不同，我之前亦有提過，係一般情況下，公司內在很難會岀現現金有折讓，所以我做法一般每一注相距最少10-20％以上，最後一注必定是絕對安全情況下才會入場。
再講賣岀，我賣出也是用倒金字塔方式，同樣也是分開份數。若果正常狀況下，我係會用慢慢食方式，分段沽出，越升得高，越賣得多。但如果是發現有瘋狂情況出現，就會一次全清，詳情請參閱之前的沽貨的藝術。
而右邊的圖，是我通常套用在點數上的一個大指標，中間一條直線係我完全睇都唔睇嘅時候。例如以恒指比喻，基本上由升穿二萬五開始我已放慢手腳，直到二萬八完全停手。而當扺達嗰條線時我係乜都唔會做，等待賣出持貨機會，例如二萬八以上只換不買，三萬二以上只沽不換。當形勢相反向下時，穿二萬八只沽空對冲持倉，不買不賣，令長線投資嘅倉值受大跌影響降低。至於二萬八這個點，我一般是用長距離的平均線定下，基本上就算技術分析或乜分析都好，急速掉頭再穿哂啲線，都係表示有恐慌出現。所以如果個市變也會跟著變，並不能堅守不變。
係心態上，金字塔理論似是一個唔認輸的策略，難聽咁講即是溝貨。但對於我而言，首先是要以有做深入研究為前提，對該股票係那個狀況下仍然有堅定的信心，所以才做加倍買貨。我用過這方法的例子非常多，成功的例子有5、656、857等等等等，得出的利潤是以倍計。而失敗的例子亦有2888，一直跌，亦越跌越深，冇復活跡象，直到今年頭賣出，持有多年亦只有微利，充份的表現蝕去時間成本。
一般情況下，有大幅波動令到好短時間觸及上同下的金字塔，我係唔會做反手操作，因為我認為若果咁樣做，即是炒波幅，不是用金字塔價值投資的時候(簡中炒下恐慌波幅，下次有機會再講，因為近期的486情況都非常有趣)。我重申我並不讚成係炒賣之中，加倍買貨，因為情況就變成賭一樣，輸完一場再加倍追賭，後果通常只有輸更多，炒賣係必須有止蝕的勇氣，短炒變長揸輸嘅不單單只是賬面上的成本。
**如果冇記錯，李佛摩係輸到第四次破產後，自殺而死的。
希望我又冇表達到難以理解啦，因為想將一套做法用文字表達，對我係非常困難。亦希望如果睇到的人，可以將佢改做更適合自己來用。畢竟個人投資係屬於自己，只有認真看待才會得到應有的回報。
今次好似寫得有點長，寫完再睇好似仲有好多要補充，不過由於可以成為一個獨立標提，唯有下次再寫。而且宜家個市真係冇乜可做，繼續沉迷打機，再見。
沒有留言:
張貼留言