近況更新(報平安、你地掉落海嘅西瓜已經俾我食哂)

首先對有留意此blog的朋友非常抱歉，由於最近很多事忙，所以已經一段時間冇更新，但我本人同投資組合並沒有出事，感謝各位電郵及pm關心。

坦白講，由於冇寫太耐已經唔記得本來想寫乜，所以今次直接講下近期我對市場嘅睇法：

貿易戰-大陸官媒的回應每次都為我帶來驚喜

香港樓市-痴線，等睇每呎過百萬

香港股市-垃圾，睇都浪費生命

美國股市-全祼待機

大陸股票-避得就避

基本上我同幾個月前想法一樣，係維持睇淡。現在加埋貿易戰下，國內的企業出事機會越來越大，所以我連很多巨型大陸新股招股亦沒有參與(嚴格來說少少都有嘅)。而利率係未來二年應該會持續向上(除了有大型事件發生)，另外，係之前美國稅改後，美企資金回流美國，新興市場會持續弱勢(中、印嗰啲避得就避、避得就避)。香港市場上大量國內股票掛牌，而我對大陸方面信心不足，所以我處於半放棄態度，直至我認為有特價出現，先會入番年頭賣嘅股票。

美國股市近期股價硬淨原因就如上面所說，之前稅改後，企業資金回流美國，而派巨息又要抽重的息稅，所以很多企業選擇回購股票，令股數減少，每股盈利增加，香港5號匯豐近幾年都係咁，所以股價比較硬，不過係7月開始的業績期，幾隻科技股(fb 、twtr等)公佈業績只是用戶量比預期差，股價立刻暴跌(當然有些舊經濟股都係咁，不過fb冇成千億市值誇張啲)，我睇法似係預演，之後還會持續出現。科技股始終升咗好多好多，嗰啲pe pb跟本已離哂太空，2000年科網股爆破都咁上下。好多香港人心目中股王企鵝700都跌唔少啊。

利申：手多入咗一隻又係業績比預期差少少的美股，即蟹，陰公、悲劇、無人性。

至於股災，我記得年頭我每日減持股票時，有人問股災幾時、同點解睇淡走。老實說，到我呢刻亦都唔知幾時或者係唔係真係會爆。因為我作為少少的投資者，並沒有能力去估計太多，只能做自己應做的事，像之前所說的低買高賣才是買賣賺錢法則。就算唔係股災岀現，股價亦有機會大升大跌。計算風險，做好資產管理，就算股災真係出現亦唔怕損失慘重。

我認為現在正處於溫水變沸水之間，作為青蛙應要提高警覺，預防煮熟。

一開始寫呢度並沒有計劃寫自己睇法，因為每件事總有人啱唔啱聽，但今次見有好幾個朋友問，回復完就加減下放上來報平安順便偷懶，唔啱睇嘅朋友請自行清除記憶，還請見諒。