一年冒險過去以及面對2019第一個Boss

由第一次寫冒險故事到今天剛好滿一年了，時間過得真係好快。係呢一年無論係投資或人生旅程中，都有非常多的得著以及改變。就個人而言，相比我前一二年的糟糕生活方式有明顯的變化，就投資而言，也令我學懂很多。至於寫blog計劃就真係比預期差，年頭定下的目標不止未能達成，而且仲差啲唔記得咗有呢度要寫😂因為暫時未諗到想寫什麼，唯有今次先做一次總結和來年預測啦。

對2018年作一個總結黎講，唉，真係有喜有悲，係年頭市場氣氛仲gogogo，再急轉直下到熊市階段。無錯，我係非常強調係熊市，而且不是細熊仔，今年仲有二個交易日就完結，上唔番三萬二至三千點我的沽貨位就表示今年睇法正確的，不過就算現在升到十萬點，我也並不後悔，因為只有自己最會相信自己睇法，人生苦短，做自己認為不會後悔的事。而重溫係呢度寫的blog𥚃，我最鍾意溫水煮青蛙、沽貨的藝術同世事如棋呢三個題材，其實之後重溫番也發現寫漏咗好多野，不過並沒有額外補充番或修改。因為這樣更能反映自己的不足，當下次改變後便能夠進步。

係題材方面成日都有意無意的加入危言聳聽，呢點實在非常抱歉。但由於我想記錄低我當時的睇法，真係好難避免，如有唔啱聽嘅朋友請自行過濾一下。(利申：我其實仲有一些寫得更悲的，但沒有post出來)如果各位有什麼想傾下的題目可以留言大家硏究一下。

雖然今年投資回報不太理想，但配合今年投資走勢來說，都總算符合預期，想避嘅避到，而避唔到嘅當然避唔到啦，就像之前說過，我主要收入來源係股息提供，所以真係鼻哥窿擔遮，鼻毛可避(避無可避)🤢不過冒險黎講，當中一定有風險。即等於誠哥所說，如果你想經歷一個平凡的故事，無風無浪，就注定只做一個平凡的人。希望2019年的冒險我繼續能夠走落去啦。

2019年的Boss

我係之前講過，我並唔係一個預言家或一個有利益的財經人。所以公開預測並不會對我有直接得益，就像世事如棋咁，我只是想將我看到的事作一個合集，再判斷好壞，和配合自己的行動來趨吉避凶，馬後砲對任何個人而言，除左自我感覺良好外，並沒有幫助，所以今次我同18年一樣，再預先公開我對19年的睇法以及部署。

貿易戰

雖然押後90日先徴收25%稅，但我暫時唔覺有績極的解決方式出現(我睇法係美國最少點都要取得一個大利益為結果)，而且亦唔見對美國有一個比中國更嚴重創傷的問題。

近三個月股市大跌

股市和債市應因為基金減槓桿及止賺，來應付加息及贖回，而科技股已全面大跌，而且比我預期多而快，因為暫未見經濟衰退數字正式出現(aapl的iphone同MacBook air又真係比預期失望嘅，而且估值真係過高)，但股票先行，各行各業未來幾個月也未必好過。

加息

啱啱12月美國今年第四次加息，並預言下年再加二次，係經濟唔好情況下堅持加息，會令到企業融資更困難，走數風險增加。我個人認為若有那未來二次加息後，先出現真正低位。

海航煲蓋問題

我之前世事如棋已經有提過海航問題，係近期香港航空的煲蓋已成為熱話。由於之前太過績極擴展，現在陸續開始出現危機。互相抵押資產貸款下，爆發會牽動其他公司，值得關注一月第一批債券到期時，會唔會連鎖效應出現。

稅改

係稅改近一年後(之前世事如棋也有提過)，簡單比喻收入減少而支出增加下，會帶來更大的發債動力，只會令惡性循環加劇。

港元息差

香港繼續唔跟加息，息差又進一步拉濶，套息活動可能又會將港滙推番至7.85。而市場上唔加息樓市gogogo說法，真心不予置評，單論樓市回報，如果不是價格持續向上，租金根本唔吸引，但若果係任何一件物件，價格只升不跌，就算係一卷廁紙也會有很多人認為值得。

經濟衰退

等緊

以上大致也同之前認為存在的問題一樣，而且未見有改善，再加上很多新出現的潛在問題。所以我對2019年係繼續看淡，本來初步估計美國係跌大概30%左右會見支持，而開始會出現合理價格的實業股，不過由於短期不樂觀的事件非常多，所以可能比預期更深更長時間下跌(即超過30%及半年)，上證指數跌咗幾年，跌咗50%，所以我自己會偏向非常保守方向，直到問題解決為止。

另外如果有認識我或有睇最開始blog的朋友，相信也知道我有接觸開黃金同白銀(現在倉內也依然持有這系列組合)，本應呢種商品類，係跌市時會反升抗跌，但係今次大跌市中也未見抗跌作用，由於今轉已寫太多，太攰了，下次才寫關於商品類冒險故事，但短期的未來我會將對佢地重點提高。

最後，非常感謝這一年有睇呢度嘅朋友，雖然我有頭無尾，越來越耐先寫一次，但見到都仲有人繼續睇，真係非常開心。如果想大家硏究下某些投資工具或睇法，可以留言或pm我啦，如果識，實答，至於下面留言，我真係冇辦法，我自己試都有時得又有時唔得，不過可能登入咗好啲。

在此再一次萬分感謝，為表謝意，附上最近名古屋之旅一張好食肉圖，謝謝、謝謝