遊戲重置

後久沒有更新了，我承認有一半原因是我完全忘記咗有呢一個blog😅，而另一半原因係因為自三月全球股災後非常忙碌。相信識我或有睇過我之前post嘅朋友，都知道我已經沒有工作多年，只靠股票或債券利息而生活，但係在今年的武漢肺炎所引發嘅環球股災後，我又再次面臨一個生活上的巨大危機。

而現在已經比較最壞時候過去咗三個多月，想借此分享一下少少面對失敗的心路歷程和我嘅個人感受。

回想起年頭，其實大部分人已經得知這個肺炎擴散速度同幅度都非比尋常，我心入面已經開始擔心。但係亦由於我本身是靠利息而生活，所以可以做的亦不多，因為如果減持手上貨量的話，會直接令我每月的被動收入下跌。而且我本身投資組合內有不同類別的投資，風險理應已經分散。所以我只買入了少量逆向etf作為對冲就算。在現在事後回望，所謂嘅對冲，當然唔夠啦😂不過與其馬後炮或後悔，不如正面咁面對。

在大概三月中時，由於除了股票、債券大跌之外，連商品類的黃金和白銀都重創。這直接令到我整個投資組合崩潰，理論上和實際上我也是淪為破產。而由於我的組合係有做槓桿，所以當資產淨值低於所需的保證金時，證券行係會自動幫我不計價地賣出我所持有的投資產品，俗稱＂斬倉＂。我到而家為止，其實都唔太記得當時被斬倉或自己斬倉嘅次數總共有多少次。只係記得非常難過，亦唔知道點做好。因為係當時，我有位朋友曾經有借錢俾我去頂住先，但係我將筆錢存入證券行，不到一秒成筆錢已經消失了。嗰刻感到非常大的無力感，因為如果我輸清，我除了自己一無所有之外還欠下一筆無力償還而又不得不還的債務。現實的說，比破產嚴重更多更多。

之後我有幾日完全冇晒思考一樣，完全唔知點做。我什至有計劃搵工賺錢黎還債俾朋友。但係當時市道上氣氛亦非常差，想搵一份正常嘅工亦唔容易。我連續幾日都冇瞓過覺，每日就好似望天打掛咁祈求停止再跌，睇完美市睇港股，當然亦有計算所謂的技術上的支持位，但係一個一個地跌穿。除了絕望，我已經諗唔到更貼切的形容詞。呢種沉重嘅心情持續咗幾日至到一星期，當時心想，我唔可以就咁放棄，一無所有也不是第一次，同朋友互相勉勵同扶持。於是再同朋友重新計劃一下究竟仲有什麼可以做，同埋計算實際總損失。當我哋搵到我哋認為最可行而又安全的方法之後，我哋開始正式合作重新出發。

故事黎到呢一刻並未完結，因為始終損失都算非常大，但係比較起最壞情況時，已經得到一個明顯的改善同見到希望。我預計會在今年底前拎回今年所失去的。

總結來說，發生這次事件無疑是非常不幸，全世界死亡人數仲已經超過五十萬。相比之下，自己仲健健康康，行得走得已經需要感恩。再者，係投資路上跌倒比順利能學識更多，輸只係因為技不如人，計算唔夠準確。買完教訓之後下次唔好再犯就好了。另外係呢度真係非常非常感謝呢位朋友的幫助及支持，如果唔係佢，我可能會沉得更耐，而且呢位朋友已經唔係第一次陪我渡過人生嘅難關，能夠每次都雪中送炭更係萬中無一，請受小弟一拜