沽貨的藝術

由於近日股市債市出現大幅波動，所以提前分享一下關於沽貨的時間。

交易之道在於低買高沽，不論股票、商品、貨物等。想要係價格上得到利益，必須經過賣岀的步驟，將手上嘅貨套現變回現金。股票上更為直接，只要係股價低時買入，股價高時賣出，中間存在價差，就會獲利。完成了一個過程，錢落咗袋，先能夠算做賺到錢，否則所有也只是賬面上的一個虛無的數字。

看似簡單的原則，只要跟住做，輸錢二字也會成為傳說。但係股票市場𥚃，就好似有種魔力操控，令到很多投資者係高位冇賣，而係低位先走去賣出，做成損失。而係我短短的投資生涯𥚃，認為做成這種成因是受情緒同氣氛影響。當股價升時，往往覺得會再升，唔好賣住，每升一格都賺多啲，相反係跌嘅時候，又想蝕少啲，令到錯失咗機會。

(一)心魔

要做到不受魔鬼操控，只要時刻保持理性，以合理估值來衡量股票價格，自然可以逃出魔掌。係日常生活中，假設係街突然有人用二倍、三倍甚至更高嘅價錢，買你手上面值一百蚊現行流通的紙幣，無理由唔賣架。當遇到股價急升時，只要想手上股票等於那張銀紙，係現實生活會賣，股票市場也只要跟著做，就自然讓心魔遠離。

(二)估值

估值簡單來說就是這公司值幾錢，就算通過背後做功課，計算咗合理估值後，係牛市中，理想賣出價格這方面也比較難取捨，當股價持續每日上升，什麼價賣出先係最好？以我現在知識水平，答案係冇。

正等於上面買一百蚊例子，今日二百唔賣，明天可能三百。係大牛市之中，什麼價格也有可能，因爲下任買家也是想從得到你賣出的股票後，再轉售獲利。

而我面對這情況時，只會係心目中定一個賺價，到達該價時再分段沽出。每沽出一次也能鎖定利潤，咁做可以避免白過咗牛市。

以我現在少少情況，我自己上年已定咗目標，當恆指二萬八千點時，最多只會換貨，不買新貨，三萬二歷史高位之上，只會賣，而且不買不換。雖然這方法對比很多牛市股神來說，根本不值一提。但對於作為投資食物鏈最低層的我，至少能夠得到賺真錢的快樂。

(三)咁複利呢？

哈，呢段係用黎挑剔自己，之前又話長期複利帶來巨大回報，賣咗咪無？現金流又點呀？

我個人認為，賣出係為咗以更快既速度走更遠的路。

係複利計算時，用息率來做複利，息率是以股息/股價，所以當股價上升，股息率會隨之下降。

假設以多人認識的內銀高息股939建設銀行為例，息率長期係5％之上，但當股價在近期高位9.39時，再扣除10%大陸股息稅後，只淨3％左右。即表示若繼續持有，以呢個價格的成本只能得到相對應的3%不動回報。這便是持有的成本，係操作上，我只要那時賣出，再等股價回落至有5%息率再買回，除咗能夠繼續享受5％複利威力之外，還有多出的股價差額，以52週低位大約6蚊計算，9蚊已經大約是本金的50%。咁即係在下次買入做複利時，本金已經是本來的1.5倍，用72定律代入，已經縮短了7年的滾存時間，這就是以更快速走更遠的路。

上面例子當然是一個假設，實際操作時，未必真的能夠極限性地做到最高同最低的50%差價。但如果有做，假設以完成度比合格缐再低的四成考量，當中已得到20%價差，也已經是四年5％的股息了，若果股價持續四年完全冇回落，實際結果也只是賺少了一個瘋狂的價差，但賺到的是一個理性的投資回報。而且我相信，升到一個大幅超出價值都唔賣嘅人，再升幾多都唔會賣，因為當刻已經被貪念控制了，最後只淨下曾經的賬面上快樂。投資同做人一樣，知足便會常樂。

重申一下，我本人是認為投資並不等於炒賣，所以之前說的複利投資，不是買入後每天希望股價賺到價差，立即可以縮短時間，因為咁諗只是單純炒股價上落。本來是用一個長期投資的心態，係瘋狂的牛市也能享受好處，才是我最認同嘅沽貨的藝術。