一間仲在市場上正常交易的公司，他的pb和pe正常也會不斷跳動，就像生物的脈搏一樣，有時跳得高，有時低，死去時同停牌後也一樣再也不會跳動。
在判斷一間公司值唔值得再花時間硏究，除了有特別消息和其他利好原因之外，我會先看呢二個數字，雖然並不能準確反映公司盈利能力，但基本也能知道之後再睇邊方面重要。就似去睇醫生，什麼病都好，都會量下血壓，中醫就先把脈一樣。
P/B price to book 市帳率=股價/每股資產價值
P/E price to earning 市盈率=股價/每股盈利能力
TTM P/E trailing twelve months 滾動市盈率=股價/最近12個月的盈利
市場上，通常每個行業的pb和pb平均值也不同，所以並不能一起比較幾多是高同低。但我自己的理解方式是pb係幾多折買緊資產，例如pb0.8，就等於八折。而pe就係幾多年回本，例如pe15，等於回本期係十五年。
關於pe
係我自己睇價值投資方面，買股票就如投資落一間公司，雖然不是自己可以控制點樣營運同管理，但手上的股票實際上是公司的一部份，一股同百分之十係冇分別。若果同朋友合資開公司，第一個問題通常都會諗下可以賺幾多同幾時回本啦，股票亦一樣。股票價格是市場眾多投資者給予的，如果市場大多數人也認為那公司非常有前景，就會高價買入，令到市盈率拉高。例如香港股王700騰訊，現在pe 57.78，即意味著現在購買，假設冇增長要57年後先收回本金。現在是不是太高，我也不清楚，因為騰訊就像受祝福的寶寶般長大，而且現在熱炒新經濟股。從歷史上睇，2000年科網股年代，過百倍或完全冇盈利來計算pe的公司也有，最後結果只剩一埸夢。(2017年尾上市的閲文、眾安等公司也是百倍pe股)。但從價值的角度，我只寧願追求平穩的公司，在股票正常時期，十倍內公司隨處可見，預測時間越短越能接近現實。所以投資的部分，我只會以十五倍為上限作為投資的第一個門檻。(當然實際十倍pe以上已非常小心)
關於ttm pe
我理解為比較會跟貼公司現況的市盈率，在投資一些高增長的公司比較重要。因為增長快的公司本來市場上已經很高的pe，看ttm如果有明顯的差距(低於靜態)，咁先證明真係增長緊架。就算比人呃咗，都唔會呃足一世(年)。
關於pb
日常生活中購物做特價自然會豪爽啲，係股市亦一樣。pb的計算方法是將股價/公司的NLV (net asset value)，
而NLV係將公司(總資產-總負債)/總股數。
論價值pb是1即等於正常，
低於1即是有折扣，假設0.8=用80蚊買100蚊資產
高於1即是要俾溢價，假設2=用200蚊買100蚊資產
當要投資時，pb是非常重要的指標之一，尤其係現金資產較高嘅公司，例如銀行、保險以及一些實業公司。低pb就像一條䕶城河，如果公司執笠清盤都唔會變成一無所有。在股市氣氛差時，更可以遇到純現金資產出現折讓的公司。(要搵現金折讓公司只要做多一歩，就是打開年報將淨現金/發行股數)。當然在不同的行業也是不能一齊比較，就是之前提過的能力圈問題，例如金融公司係用錢做生意、實業公司通常有物業做廠房或存放，而一些科技公司就沒有或比較少。所以要比較也是用同行更實際，當熟悉一種行業，看pb就已經初步得知平定貴。不過有樣可以肯定的，穩健的公司pb低於1時買入，蠃嘅機率會大過高於1時買，例如香港藍籌股。
由於pb好似寫得難理解，所以小小馬後炮分享，在之前沽貨清單中，其中一隻我持有的1113長實賣出主要原因，就是跟據pb高於1而選擇在近75元沽出，因為香港地產股多年來普遍存在大折讓，而當時因為市場願意以高於內在價值，收購我較早前以折扣購入的資產。所以我認為是合理價地出售，便決定成人之美。雖然並不是最好的結果，但由於是跟著自己的紀律執行，所以對自己也是合格。
利申：現時pb約0.9，仲未打算買入番
(以上內容如果有錯漏，請指點一下，因為平常計，好少會列出，而且很多數字是可以在報價看到，所以懶開怕記錯。而且真的不要直接跟買賣，自己的投資要自己負責，例子只是想更方便表達。)
因為最近比較忙於處理自己的投資同打機，所以不能按之前計劃一星期更新一次，真的很抱歉唷。本來今次其實想寫下關於近期股市波動同美國債息急升的事(我覺得對之後投資環境有很大影響)，不過因為收到朋友的要求，所以再繼續寫一些離開冒險新手村的基本裝備，但其實寫落又真係提醒番我好多，因為平常已變習慣的事，有時真係會唔記得咗。雖不能單靠pb同pe來判斷估值，但作為一個表面的訊息是非常有用，去露營都會帶多包紙巾啦，更何況投資冒險。
補祝各位新年快樂、贏到開巷，恭喜恭喜。
沒有留言:
張貼留言